COVID-19aren aurkako txertoaren lehen dosiak iritsi dira Urduñara

Nagusien egoitzako egoiliar eta langileek jaso dute gaur txertoaren lehen dosia.

Koronabirusaren aurkako txertaketa kanpaina Urduñara iritsi da gaur. Nagusien egoitzako 60 egoiliar eta langilek jaso dute goizean COVID-19aren aurkako txertoaren lehen dosia.

“Oso balorazio positiboa egiten dugu” azaldu du Silvia Barrios nagusien egoitzako arduradunak.

Ez da inongo arazorik egon, zahar-etxetik jakinarazi dutenez. Egoiliarrek ilusioz hartu dute lehen dosi hau. “Txertoa aurrerapauso berri bat da, hain zaila izan den azken urte hau atzean uzteko”.

Espazio berezia egokitu dute Urduñako egoitzan gaurko txertaketa saioa gauzatu ahal izateko. Eskailera eta sarrera bereziak jarri dituzte kutsatzeko arriskuak ahalik eta gehien murrizteko asmoarekin.

Baikor azaldu da ere Itziar Biguri Urduñako alkatea ere; baina ohartarazi du, koronabirusak kalean jarraitzen duen bitartean, oraindik existitzen dela nagusien egoitzan berriz sartzeko arriskua. Horregatik arretaz eta arduraz jokatzeko eskatu die herritarrei, eta adierazi du, orain arte bezala, koronabirus kasuen jarraipena egiten jarraituko dutela. “Agerpen berririk egotekotan kudeatuko genuke, orain arte kudeatu dugun moduan.”

Pandemia hasi zenetik lau gaixotu egon dira Urduñako nagusien egoitzan, eta guztiek lortu dute koronabirusa gainditzea. Maiatzean harrera beroa egin zieten lau egoiliarrei ospitaletik erresidentziara bueltatu zirenean.

Txertaketa kanpaina aurrera

hurrengo aste eta egunetan iritsiko dira COVID-19aren aurkako txertoak eskualdeko gainerako herrietara. Urduñan bezala, nagusien erresidentzietako erabiltzaileak eta langileak izango dira txertatzen lehenak.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide