Auzolan eguna egin zuten iragan larunbatean Urduñako Herri Ikastetxean, hiriko Auzolan lantaldeak deituta. Bizilagun ugari batu ziren, eta hainbat lan egin zituzten denen artean. "Negutegia kendu egin genuen lehenbizi. Ondoren, kolunpioen mantenua burutu genuen: lijatu eta barnizatu", azaldu du Eneko Calejero Beldarrainek. Lorategian zeuden egurrezko mahai batzuk kendu eta berritu zituzten baita, eta lurrean margotuta dauden jokoak berriz koloreztatu zituzten.
Aurreko auzolanean hasitako amaitzeko ere baliatu zuten eguna. "Foru plazako bankuak kendu genituen, lijatu eta barnizatzeko, eta berriro muntatu genituen larunbatean", azaldu du Auzolan lan-taldeko kideak.
Ohiko parte hartzaileez gain, guraso ugari ere bertaratu ziren laguntzera. Balorazioa, beraz, "oso ona" da, Calejeroren ustez. "Jende asko bertaratu zen gurekin lan egitera. Eskerrak eman nahi dizkiegu bertaratu ziren guztiei, oso lan ona egin baitzuten".
Udan, geldialdia
Udan geldiadia egiteko asmoa dute lan-taldeko kideek. "Irailean hasiko gara berriro, ibaiaren garbiketarekin, urtero bezala".
Urte hasieran berraktibatu zen Urduñako Auzolan taldea. Udaberrian ekin zioten lanari, eta hilero auzolan bat egin dute ordutik hona:
Argazkiak: Urduñako Auzolan lantaldea
