Euskal Herria alderik alde jostea du helburu 2021eko Urmuga ekimenak, eta mendizaletasuna eta musika baliatuko dituzte horretarako. Atzo -uztailak 14- Aiaraldean egin zuten lehen geldialdia zeharkaldian buru-belarri sartuta dauden lagunek.
Tologorri inguruan, Ponatan, eskaini behar zuten kontzertua Urduñako Andra Mari elizara lekualdatu behar izan zuten euria zela eta, baina mendizaleek aukera izan zuten Angulo mendatea eta Urduña lotu zituen ibilaldi eder batez gozatzeko. Geldialdia bukatuta, Donostiako Orfeoia, Mixel Etxekopar Noemi Viana Dantzaria eta François Rossé aritu ziren arratsaldea girotzen.
Iaz ere Aiaraldean hasi zen Urmuga ibilaldia eta eguraldia ona izan zenez, Ponatan bertan egin zuten musika eta dantza emanaldia.
Urmuga 2021
Bi aste ditu aurretik ekimenak. Euskal Herria alderik alde gurutzatzen duen zeharkaldiak mendizaletasuna eta musika uztartzen ditu, kantauriar eta mediterranear isurialdeen arteko muga naturala jarraituz. Geldialdi bakoitzean kontzertu bana eskainiko dute Euskal Herriko eta atzerriko hainbat musikari eta kantari esanguratsuk.
Guztira 12 kontzertu izango dira. Guztiek izango dute Et Incarnatus orkresta oinarri, baina eurekin Dupla, Gorka eta Nerea Urbizu, Alex Sardui, Olatz Salvador, Nogen, Anari, Chill Mafia, Niko Etxart, Juantxo Arakama (Glaukoma), Idoia Asurmendi eta beste hainbat musikari arituko dira. Urmugako webgunean aurkitu daitezke gainerako kontzertuentzako sarrerak.