Terreroko jaiak ospatuko dituzte uztailaren 30ean

2017an berreskuratu zituzten Terreroko Jaiak. / Antonio Muñoz

Urduñako Terrero auzoko jaiak ospatuko dituzte datorren uztailaren 30ean. Auzokide talde batek ospakizunak berreskuratu zituzten duela urte batzuk eta, ohikoan bezala, egun osoko egitaraua prestatu dute.

Uztailaren 30ean Terreroko Jaiak lehertuko dira berriz ere Urduñan. Jai Batzordeko kideek egun osoko egitarau oparoa prestatu dute. Hainbat urtez ospatu gabe egon ostean, auzokide talde batek 2017an berreskuratu zituen jaiak. "Sona handiko festak ziren bere garaian, guk oso oroitzapen goxoak gordetzen genituen, eta horregatik erabaki genuen festak berreskuratzea" azaldu dute antolakuntzan aritzen diren bizilagunek.

Egun osoko egitaraua

"Goizetik iluntzera arte, egun osoko egitaraua eskaini nahi izan diegu herritarrei", nabarmendu dute Jai Batzordetik. Lehenengo suziriarekin batera piztuko da jaia, 11:00etan, eta tortilla txapelketari segida emango diote jarraian. Antolakuntzako kideek adierazi dute eurek emango dutela txapelketan parte hartzeko behar den guztia.

Tortilla txapelketaren emaitzak 13:00etan jakinaraziko dituzte, trikiti doinuz lagunduta. Herri bazkaria 15:00etan egingo dute, baina aurretik haurren bazkaria hasiko dute, 14:30ean.

Arratsaldean ere ez da ekintzarik faltako: Puzgarriak, bola jaurtiketa, igel-toka txapelketa, kuadrillen arteko decathlon herrikoia... 20:30ean parrillada solidarioa egingo dute, eta AEFAT elkartera bideratuko dute bildutako diru guztia.

Musika eskaintza zabal batek itxiko du egitaraua iluntzean. 21:00etan Tolin mariatxia arituko da oholtza gainean, eta 22:00etan dantzaldia hasiko da DJ Makaldi musika jartzailearen eskutik. 23:00etan, ordea, umore eta transformismo ikuskizuna eskainiko dute, eta 00:00etan DJ Varrok festa luzatuko du goizaldeko 3:00ak arte. Ordu horretan zozketa egingo dute, jaiari amaiera emanez.

"Jai herrikoi eta parte hartzaileak dira gureak", azaldu dute batzordean parte hartzen duten auzokideek. Horregatik, deia zabaldu dute Terreroko bizilagunen artean jaien antolakuntzan laguntzeko. Urduñako gainerako auzoei ere luzatu diete gonbita bikoitza: "Terreroko jaietan disfrutatzea, eta euren auzoetan jai herrikoi eta parte hartzaileak berreskuratzea, guztion gozagarri izan daitezen".

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide