Azaroaren 13an, igandez, jokatuko da Urduñako bosgarren mendi lasterketa. Hiru zirkuitu proposatu ditu Gualdetxuk, Urduñako Mendi Lasterketak eta Euskal Federazioak osatutako antolakuntza taldeak: batetik, 33 kilometrokoa (1.750 metroko desnibelarekin), bestetik errelebokako kategoria, eta azkenik 14 kilometrokoa.
Binakako modalitatean -hots, errelebokakoan- lehen partaideak 17 kilometro osatu beharko ditu, eta bigarrenak 16 (ibilbidea zirkuitu nagusiarena izango da).
"Eskerrak eman nahi dizkiegu gugan konfidantza jarri duten babesle, laguntzaile eta korrikalari guztiei"
"Eskerrak eman nahi dizkiegu gugan konfidantza jarri duten babesle eta laguntzaileei. Eskerrik asko izena eman duzuen korrikalari guztiei, zuek ikusteko irrikan gaude!", adierazi dute antolatzaileek sare sozialetan.
Irailaren 20an aipatu zutenez, 300 lasterkarik emana zuten izena ordurako jada. Horrenbestez, pentsatzekoa da dortsalak agortuko direla.
Gainera, Euskal Mendizale Federazioaren Koparen parte izango da Urduñako proba.
Hemen ikusi daitezke iazko edizioko argazkiak.