La Posadaren eraikina botatzeari ekin diote gaur Urduñan. Arratsalderako zati lanak nahiko aurreratuak zeuden, eta bihar jarraituko dute obrekin.
La Posadaren atzean dauden eraikinak ere botatzen ari dira. Modu horretan, libre utziko dute bertatik Zagueras kaleraino dagoen espazioa, etxebizitza berriak eraikitzeko.
Ia 100 urteko historia
Modu horretan, Urduñak behin betiko esango dio agur hiriko eraikin mitikoetako bati. Bertan zegoen La Posada taberna beteranoa. Jabeek apirilean esan zioten agur establezimenduari. Gogorarazi zutenez, 1923. urtean ireki ziren La Posadaren ateak lehenbiziko aldiz, eta ordutik hona "hirian gertatu diren gertakari guztien lekuko iraunkorra izan da" establezimendua.
"1960ko hamarkadatik aurrera, batez ere, inguruko lantegietara lanera joaten ziren langile askoren etxea izan da La Posada; eztei, bataio eta gainerako jaietako oturuntzak egiteko tokia izan da; bizilagunen topagune izan da… Azken finean, ostalaritzako lokal bat baino askoz gehiago izan da". Hala azaldu zuen Janire Ornesek apirilean Aiaraldea Komunikabidean plazaratutako zutabean.