Amaitu dira Urduñako Otxomaio jaiak. Iluntzeko bederatzietan abiatu dute Bihotzari agur esateko kalejira. Ohikoan bezala, tristura eta alaitasuna uztartu dituzte, hileta umoretsua irudikatuta.
Hiriko kale nagusiak zeharkatu ondoren iritsi dira Foru plazara, eta orduan eman diote su Bihotzaren panpinari, petardo zaparrada ozena piztu ostean. Jarraian, hainbat haur eta nerabe animatu dira piloian bainatzera.
Udalak, balorazio positiboa
Festen balorazio positiboa egin du Urduñako Udalak. Lehen asteburutik egondako parte hartze zabala goraipatu du tokiko erakundeak, jende asko bertaratu dela nabarmenduta. Tortilla eta paella txapelketan, adibidez, inoiz egondako parte hartzerik handiena egon zen.
Bigarren asteburuan, aldiz, eguraldia kaskartu egin da, baina horrek ez du jende kikildu. "Larunbatean giro handia egon da herri bazkarian eta Esne Beltzaren kontzertuan plaza topera egon da, nahiz eta euri azpian egon", azaldu du Itziar Biguri alkateak, "gaurko egunean, aldiz, putxerak izan dira protagonistak. Eguraldi kaskarra egon arren 62 putxera egon dira eta oso giro polita sortu da plazan".