Ikasturte berriari gogoz helduko diote Urduñan. Izan ere, UrduFolk jaialdia eta Koroatze jaiak ospatuko dituzte iraileko lehenengo bi asteburutan, hiriko kaleak musikaz betetzeko asmoarekin.
UrduFolk jaialdia
Irailaren 1ean ekingo diote UrduFolk jaialdiaren edizio berriari. Ohitura bilakatu den bezala El Trasno bandako gaiteroek kalejira batekin inauguratuko dute, urtez urte geroz eta entzutetsuagoa bilakatzen ari den folk jaialdia. Kontzertuak 21:15ean hasiko dituzte eta Alex Lopez amurrioarraren Sensei Music Ensamble banda izango da, ofizialki, jaialdiari hasiera ematearen arduraduna, Guadi Galego taldearekin batera.
Larunbaterako -irailak 2- egun osoko egitaraua prestatu dute. 10:00etan tokiko produktuen azoka egingo dute Foru Plazan, eta 13:00etan Matraka Culinary Center familientzako euskarazko ikuskizuna eskainiko dute.
19:00etan El Trasno taldea gaiten kontzertu batekin taularatuko da Foru Plazako eszenatokian. Iluntze horretako kontzertuak, aldiz, Guillen Anguera Quartet eta Goxua N’ Salsa izango dira, 21:15etatik aurrera.
Koroatze Jaiak
UrduFolk jaialdiarekin batera Koroatze jaiak ere ospatuko dituzte irailaren 3an eta 10ean. Irailaren 3an XXIII. Marmitako Txapelketa ospatuko dute Foru Plazan, Igel Abestokia Txokoak antolatuta. Lehiaketa gastronomikoa Bizkaiko Txapelketaren barruan egongo da kokatua, eta parte hartzaileak 9:00etan hasiko dira lapikoak prestatzen.
Irailaren 10en VIII. Euskal Kanta Herrikoien topaketa egongo da. Bertan, Laudioko Arloteek eta Bi Hotsak abesbatzak, Deustoarrak Abesbatzak, Ugarte otxote amurrioarrak eta Urduñako Oilarrak taldeak hartuko dute parte; Jose Laña zuzendariaren gidaritzapean egongo den Santa Zezilia musika bandarekin batera.
Hemen kontsultatu daiteke egitarau osoa.