Aurrera doaz Urduñako harresia berreskuratzeko lanak, Eusko Jaurlaritzak emandako diru-laguntzaren bidez. 675.000 euro eman zizkion erakunde horrek Udalari obrak egikaritzeko 2022 eta 2023an, Berpiztu programaren barruan. Andra Mari parrokiaren eta harresiaren artean parke bat sortzea da Udalaren asmoa, bertako ondare historiko eta arkitektonikoari balioa emateko. Eszenatoki bat, pasabide bat eta lorategi bat eraikiko dituzte horretarako.
Lanen bilakaera gertutik ikusteko bisita egin zuten astelehenean Eusko Jaurlaritzako eta Udaleko ordezkariek. Bertan egon ziren Kultura eta Hizkuntza Politikako sailburu den Bingen Zupiria eta Urduñako alkate Iker Santocildes, besteak beste.
Zupiriak azpimarratu zuen Urduñako hiria “toki oso esanguratsua” dela historikoki. Gauzak hala, oso garrantzitsutzat jo zuen sailburuak “ondare historikoa berreskuratzea eta balorean jartzea”, eta “denon artean” egin beharreko lana dela nabarmendu zuen, erakunde ezberdinen lankidetzarekin eta herritarren inplikazioarekin. Bide horretan kokatu zituen Jaurlaritzaren Kultura 2028 Plan Estrategikoa edota Aiaraldeko Lehentasunezko Jarduera Eremuko inbertsio plana.
Urduñako alkateak, bere aldetik, Eusko Jaurlaritzak eginiko ahalegina eskertu zuen, "Urduñako ondare historikoa balioan jartzeko eta bertan bizi diren pertsonei eta bisitariei gure iragana eta historia ezagutzeko aukera eskaintzeko".
1997an izendatu zuten Urduñako harresia Babes Bereziko Kultura Ondasun, Monumentu Multzo kategoriarekin. Bertan parkea eratzeko proiektua, aldiz, 2022an aurkeztu zuten.
Argazkiak: Irekia Eusko Jaurlaritza