Angel Salas Larrazabal urduñarrak Francisco Francok eta beste general afrikanistek emandako estatu kolpean aktiboki parte hartu zuen 1936an eta horren adibide izan zen Otxandion eragindako sarraskia. Berez, "Otxandioko harakina" izendatu zuten herri horretan egindako bonbardaketaren ondorioz.
Hori dela eta, Memoria Historikoko Legea betetzea eta Salas Larrazabali demokrazian emandako kondekorazio guztiak kentzea eskatu dio Gorka Elejabarrieta EH Bilduko senatariak Espainiako Gobernuari. Izan ere, Juan Carlos I. erregeak eta Felipe Gonzalezek 1991n Aire Armadako Jeneral izendatu zuten dekretu bidez, bere “aparteko merituengatik”.
Espainiako Gobernuaren konpromisoa
Angel Victor Torres Lurralde eta Memoria Demokratikoko Ministroak azaldu dio EH Bilduri hori egitera konprometitu direla. Horretarako, militar urdañarrari buruzko beharrezko txostenak eskatuko dituzte eta prozedura jarraiki, kondekorazioak ukatuko dizkiote.
Aintzat hartu beharra dago Urduñako Udalak jadanik hori egin zuela 2016an, Otxandioko bonbardaketaren eta suntsiketaren 80. urteurrenean. Hain zuzen, Otxandioko herriari barkamena eskatu zion tokiko erakundeak.
