Maiatzaren 31n eta ekainaren 1ean ospatuko dute Urduñako Aefat Jaialdiaren II. edizioa. Duela bi urte antolatu zuten ekimena lehendabizikoz, Ataxia-Telangiektasia gaixotasun arraroaren kontrako ikerketarako dirua biltzeko asmoz. Lehenengo edizio hartan 5.500 euro batu zituzten, eta balorazio positibo horretatik ekin diote bigarren jaialdia antolatzeari.
Motorren elkarretaratzea, aurtengo berritasuna
II. edizioko berritasun nagusia ekainaren 1ean egingo duten motorren kontzentrazioa izango da. Iragan otsailaren 29tik dago zabalik bertan parte hartzeko izen ematea, eta inskripzioarekin batera, zapi oroigarria eta paella jana jasoko dute motor-zaleek.
Horrez gain motorren aparkaleku zaindua edota aterpean lo egiteko aukera ere eskainiko du antolakuntzak, arratsalde eta iluntzeko egitarauaz gozatzeko ere.
Musika eskaintza protagonista
Motorren kedadak ez ezik, bestelako hamaika ekintzek ere osatuko dute jaialdiko egitaraua: Zumba, haurrentzako jolasak, buruhandiak… Asko dira ere antolakuntzan lagunduko duten talde eta eragileak: Izaskun del Cerro, Erauntsi Dantza Taldea, Getxa Goi Txistu Taldea, Bihotza Konpartsa, Urduñako ibilgailu klasikoen elkartea, El Pilón, Loraldi Elkartea, Marmitaren Elkartea, Nafarroa Kanta, Batture Batukada, Urduñako Korala eta Santa Zezilia Banda beste askoren artean.
Duela bi urte egin bezala, musika eskaintza zabala izango du jaialdiak eta larunbat iluntzeko kontzertuak izango dira protagonistak. Oholtza gainetik Mario Malatestta eta la Excavadora bandak igaroko dira, Bon Scott Revival Show taldearekin batera; azken hau AC/DC rock banda australiarren bertsioak egiten dituen talde ezaguna da.
Jai-giroa luzatzearen ardura, ordea, Urduñako artista batena izango da. Elena Barker Synthetika kolektiboko kidearen musika elektronikoak itxiko du Aefat jaialdia.
Lan boluntarioa
Kepa Vallejok, Ataxia-Telangiektasia pairatzen duen Hodei gazte urduñarraren aitak, asko eskertu du gaixotasun arraro honen ikerkuntzaren alde eskualdean burutu diren elkartasun ekimenak. "Zorionez, jendea oso solidarioa da eskualde honetan, eta Hodeiren diagnostikoa jaso genuenetik, gurekin eta Aefatekin batera aritu dira Ataxia-Telangiektasi ikertzeko borrokan. Hemen Urduñan, Amurrion eta eskualde osoan era guztietako ekitaldi solidarioak antolatu dira. Zorte handia da hemengo jendearekin kontatzea, badakitelako ezin dugula bakarrik borrokatu eta ikerketarako funts publikorik ez dagoela", azaldu du Vallejok.
Antolakuntzan buru-belarri dauden pertsonei eskerrak eman nahi izan dizkie bereziki Vallejok: "Aitor Lanseros, Iñigo Santocildes eta Jorge Ugalde boluntarioki ari dira guztia antolatzen dena primeran atera dadin eta ikerketarako dirua bildu ahal izateko”.