Athleticzale amorratua izanda, Joseba Urruelak eginkizun berezia izan zuen Athletic Clubak jokatutako Errege Kopako finalean. Izan ere, Radio Euskadiko soinu teknikari gisa joan zen Andaluziako hiriburura bi erronka zailekin: bere lana ondo egitea eta bere taldea irabazten ikustea.
Gainera, biak bete zituen, baina une latzak bizitza. "Oso urduri egon naiz aurreko egunetan, lanagatik, baina baita Athleticeko zale naizelako", aitortu du urduñarrak. Luzapena, penaltiak, garaipena... Baina berarentzat ardurak ez ziren hor amaitu: "Aurreikusita genuen 2:00ak arte zuzeneko emisioa egitea, eta azkenean 3:00ak arte iraun zuen".
Dena den, aparteko ordu horrek sari berezia eman dio Urruelari. Hain zuzen, 3:00etan, gune mistoan (hau da, jokalariak adierazpenak egiteko erabiltzen duten tokian) dozena bat kazetari baino gutxiago geratzen ziren, Urruela bera horien artean. Gauzak horrela, Janire Fragua ETBko kazetariak iradoki zien klubeko arduradunei kopa erakustea han geratzen zirenei.
Esan eta egin. Klubak Errege Kopa hartzea eskaini zien geratzen ziren komunikazio langile apurrei (oro har Athletic Clubeko egunerokotasunaren berri ematen dutenak) eta Joseba Urruela pribilejiatu horien artean egon zen. Gainera, zorte on apur bat gehiago izan zuen Urruelak: "Athleticeko argazkilari ofizialak eskatu zigun horma baten aurrean egitea argazkia, hor jartzen baitzuen Sevillako finala zela, eta horri esker nik pixkat gehiago eutsi nion, neuk eraman bainuen haraino".
Klubak Errege Kopa hartzea eskaini zien geratzen ziren komunikazio langile apurrei (oro har Athletic Clubeko egunerokotasunaren berri ematen dutenak) eta Joseba Urruela pribilejiatu horien artean egon zen
Zirrara berezia
Zale eta langile moduan sufrikarioa pairatu ondoren, Errege Kopa esku hartean izatea saria ederra izan zen Joseba Urruelarentzat: "Lehenetarikoa izan nintzen hartzen eta zirrara berezia sentitu nuen. Nire bizitzako egun garrantzitsuenen artean dago. Izugarri hunkitu nintzen, poz-pozik nengoen, baina baita nekatua ere, lan gogorra egin eta gero. Pisutsua da, baina niretzat ohorea izan zen jokalariek ukitu ostean hartzea".