Urduñan eta Beloradon dauden moja klaratarrak soka luzeko polemika elikatzeko prest daude eta, horretarako, eskura dituzten baliabideak erabiltzen hasi dira. Gauzak horrela, Instagram kontua ireki dute eurei buruz azaleratu diren informazioei aurre egiteko.
Profil horren bitartez, bi mezu zabaldu dituzte. Alde batetik, ez direla zismatikoak eta ez daudela bahituta. Bestetik, ez dutela Eliza Katolikoa utzi.
Irudian ikus daitekeena, ordea, kontraesanean dago mojek esandakoarekin. Izan ere, zabaldu duten selfiean Pablo de Rojas Sanchez-Francoren ordezkari bat agertzen da. Gogoratu beharra dago Mario Izetak berak kanporatu zuela gizon hori Elizatik.
Mojak eurak, story bilakatu duten bideoan, irribartsu iragarri dute bideo gehiago plazaratuko dituztela azalpen guztiak emateko eta "egin dituzten aurkikuntzak" argitzeko.
Astelehenean harrotu zituzten hautsak klaratarrek, adierazita Eliza Katolikoa utziko zutela eta Pablo de Rojas Sanchez-Francoren ordenera batuko zirela. Horren guztiaren atzean dago, hedabideek azaldutakoaren arabera, Gasteizko elizbarrutia Urduñako komentuaren erosketaren kontra agertu izana.
Hautu hori hartuta, gainera, klaratarrek Pablo de Rojas Sanchez-Francoren erakundearekin egin dute bat. Erlijioso horrek eskuin muturreko ideiak defendatzen ditu eta Opus Deiko ideiak ditu, Eliza Katolikoaren zilegitasuna ukatuta.
