Atzo erakunde ordezkarientzako inaugurazioa egin ostean, gaur giro herrikoian aurkeztu dute Belardi haragi eraldaketarako zentroa, zeinak hiltegia eta hainbat zerbitzu biltzen dituen. Azpiegituraren nondik norakoak ezagutarazteko baliatu dute hitzordua eta gelaz gela azaldu dute nola funtzionatzen duen tokiak.
Inaugurazio ekitaldia bera omenaldiz beteta egon da. Aitor Junguitu abeltzainari makila eman diote, bere aitak (zendu zena) egindako ekarpenagatik eta ezustean Mikel Kormenzana bera goraipatu dute, proiektua gauzatzeko egindako lan izugarriagatik. Izan ere, Belardi gauzatzeko lanak 20 urte baino gehiago iraun du, lege eta arau aldaketak barne.
Horrez gain, Urduñako hiltegiko azken langileak ere aipatu dituzte, belaunaldien arteko transmisioa eta garrantzia irudikatzeko.
Horren guztiaren ostean, haragiaren eraldaketarako prozesua nola bideratzen den argitu dute. Horretarako, 15 eta 20 lagunen arteko hainbat talde sortu dituzte eta gela bakoitzean Belardi elkarteko kide batek adierazi die nola funtzionatzen duen tokiak.
Azkenik, eta Zapalan elkarteko boluntarioei esker, tokiko produktuekin prestatutako mokadua eskaini dute. Izan ere, Belardi egitasmoa ez da hiltegi hutsa, tokiko ekoizle eta abeltzainei erraztasunak ematea du helburu, kate handien menpekotasuna mugatzeko, gertuko merkatuak sustatzeko eta ahalik eta askitasun gehien eskuratzeko.
Halaber, irizpide sozial sendoak ditu ekimenak eta, adibidez, Zapalan elkarteak, zeinak egoera zaurgarrian dauden lagunekin lan egiten duen, trebakuntza ikastaroak eskainiko ditu Belardin, pertsonen lan merkaturatzea ahalbidetzeko.