Aurtengo txupineroak zarete. Aurkeztuko duzue zuen burua?
Javi Santocildes Puente: Urte andana daramazkit, 46 edo 47, saskibaloiaren kontua aurrera ateratzen Urduñan. Nik sortu nuen Bedarbide Saskibaloi Taldea, beste hiru kiderekin batera, eta hemen jarraitzen dugu.
Txema Gonzalez Zurimendi: Ni duela hogeita sei urte Urduñan sortutako arrantza eskola batetik nator, non Aiara osoko haurrek parte hartu duten. Eskola desegin berri da, jarraipen faltagatik, baina ibilbide polita egin dugu urte hauetan guztietan. Arrantzazeaz gain, beste hamaika kontu irakatsi diegu eskolara bertaratu diren haurrei: natura errespetatzea, biologia, ibaien egoera…
Txupinero izateko hautatu zaituztete. Nola jaso duzue albistea?
J.S.P.: Pozik, pozik. Duela hamabost urte txupina botatzea egokitu zitzaidan ere. Kasu horretan klubarekin egin nuen, bertako haur guztiekin, Bedarbide Saskibaloi Taldearen 30. urteurrena zelako. Oraingo honetan ez dugu hitz egin beharko, beraz errazagoa izango da. Nik gainera suziriarekin apuntatzeko asmoa daukat (barreak).
T.G.Z.: Nik ez nuen espero, inondik inora. Badakizu, urtero, Otxomaio guztietan herritarrak hautatzen dituztela txupina jaurtitzeko, baina nik nire burutik kanpo neukan hori. Oso pozgarria da gonbita jaso izana. Gure alde bozkatu dutenei eskerrak ematea besterik ez dugu. Hasiera batean kezkaz jaso nuen deia, balkoitik hitz egin behar genuela uste nuelako (barreak).
Asko pentsatu nuen nik baiezkoa eman aurretik. Ez zaizkit horrelako gauzak asko gustatzen. Gure lanaren eskertzarik handiena, eta imaginatzen dut Javiri berdina gertatuko zaiola, kaletik haurrek geratzen gaituztenean jasotzen dugu.
Zer garrantzi dute zuentzako Otxomaio jaiek?
J.S.P.: Izugarrizko garrantzia. Urduñan jaioak garenontzat eta txikitatik jaiez gozatu dugunontzat izugarriak dira festak.
T.G.Z.: DNAn daramagu. Eta jaietan nahi baino gutxiago parte hartu arren, festa beti da alaitasunaren sinonimo.
J.S.P.: Inguruko lehenengo jaiak dira gainera. Egia da gorputzak ez duela lehen bezala aguntatzen, baina beti hartzen dituzu askoz gogo gehiagorekin.
Aurten txupineroak izanda ahalegin berezia egingo duzue ekintza gehiagotan parte hartzeko?
J.S.P.: Nahi eta ezin. Maiatzaren 2an da txupinazoa, eta biharamunean partida daukat. Maiatzaren 10ean beste hiru partida zuzendu behar ditut. Gogoko tokian aldaparik ez, moldatuko gara zerbait egiteko!
Zer garrantzia du hiriko elkarteen presentzia Otxomaio jaietan?
T.G.Z.: Erabatekoa. Antolatzen diren ekintzen gehiengoa elkarteen ekarpenari esker antolatzen dira. Eta ona da ikustea nola inplikatzen ari den jende gaztea horretan.
Zer mezu nahi diezue helarazi herritarrei?
T.G.Z.: Jendeak ikaragarri ondo pasatu dezala eta alaitasunez disfrutatu ditzala Otxomaioak, inolako gatazkarik gabe eta errespetuz. Gera dadila aurtengo festen oroitzapen polita memorian.