Zer da Euskaraldia zuretzat?
Euskaraz bizitzea posible dela esperimentatzeko aukera bat.
Nola parte hartuko duzu bertan?
Belarripresteko txapa eramango dut eta horretaz aparte, euskara eguneroko harremanetan gehiago erabiltzen saiatuko naiz. Euskaraldiaren orri-markatzailean agertzen diren erronkak ere oso dibertigarriak iruditzen zaizkit.
Euskaldun berri bezala ahalduntzeko aukera ere ikusten dut Euskaraldia. Ni euskaldun berria naiz eta askotan bai inertziagatik bai beldurragatik euskara erabiltzeko aukerak galtzen ditut. Euskaraldiak sortzen du esparru paregabea euskara konplexurik gabe praktikatzeko eta euskararen komunitatearen parte sentitzeko.
Zure inguruko hizkuntza ohituretan eragina izango duela uste duzu?
Bai, argi eta garbi. Hamaika egunetan gauza asko aldatu ahal dira, eta batzuk geratzeko helduko dira. Batzuetan kontzientzia hartu baino ez dugu behar eta horretarako Euskaraldiak bide berriak zabaltzen ditu. Adibidez: beti gazteleraz hitz egin duzun lagun batekin euskaraz mintzatzeko uneak bila ditzakezu edo ikasten ari den norbaiti laguntzeko aukera sor daiteke. Txapekin jendea ikusteak konplizitate berriak sortzen ditu eta normalean hain handiak iruditzen diren oztopoak (lotsa, zalantzak, aurreiritziak...) desagertzen dira.
Lanean ikusi nuen Euskaraldiaren beste edizioetan: normalean ezezagun bati zuzentzen diodanean, gaztelerara pasatzen den jendeak, txapa ikusita, euskaraz jarraitzen du.
Gainera, zerbait magikoa ere badauka Euskaraldiak: intentzioaren eta komunitatearen boterea. Asko gara euskara maite dugun jendea eta sinkronia hori sentitzen da giroan, oso hunkigarria da. Emozioaren bideetatik ere aldaketa handiak gauzatzen dira.