Hil ala biziko partida zuen CD Orduñak igandean Uritarra klubaren kontra eta, zorionez, ez zuen kale egin. Helburua betetzeko, ordea, sano sufritu zuten taldeak eta baita bisitari moduan Larrabetzun zeuden jarraitzaile gorriek ere.
Markaiguak 2-3 emaitza jaso zuen norgehiagokaren amaieran, baina irabazteko azken minutura arte itxaron behar izan zuten urduñarrek, orduan egin baitzuten garaipeneko gola.
Horrez gain, matematika ariketa egokitu zitzaien gorritxoei. Izan ere, kategoria galtzeko arriskuan zeuden beste bi taldeen eta euren artean jokatu zuten azken jardunaldian. Alde batetik, Mungia zegoen (urduñarrak baino puntu bat gehiagorekin) eta bestetik, Sondika, hiru puntuko abantailarekin.
Azkenean, Mungia gailendu zen (aurreko astean Arbieton egin bezala) eta Sondikarekin sailkapenean berdindu eta gero, CD Urduñak baliatu zuen bere alde zegoela gol averagea.
Dantzan zegoen beste aldagaia zen play offa jokatzea edo ez, baina Zazpi Landa kluba Lurraldeko Lehen Mailatik bigarrenera jaitsi denez, bere filialak ere galdu du kategoria, biek ezin baitute aldi berean lehiatu.
Argazkiak: Iker Gorostiaga