Ibon Cormenzanak larunbatean aurkeztu zuen Cuatro paredes filma Urduñan. Bertan grabatu du pelikula, Alde Zaharreko etxebizitza batean nagusiki; eta, izenburuak iradokitzen duen moduan, istorio gehiena espazio itxian filmatu dute. Irudiren bat Antzinako Andra Mari Eskolan ere hartu dute.
Zinemagileak eurak azaldu zuenez, familia gurasobakarren prekarietateari buruzkoa da proiektua eta Save the children gobernuz kanpoko erakundearekin landu dute elkarlanean. Erakunde horren proposamena izan zen pelikularen sorburua.
Berez, apirilean izan zen filma luzearen aurrestreinaldia BCN Film Festen eta ostiralean heldu zen zinema aretoetara. Hori baliatuta, ezusteko estreinaldia egin zuten Urduñan eta, denbora tarte txikia erabili bazuten ere, ehun lagunek baino gehiagok parte hartu zuten proiekzioan.
Urduña berriro
Berez, ez da lehenengo aldia Ibon Cormenzanak Urduñan grabatzen duela. Hain zuzen, El bus de la vidaren errodajea ere hirian izan zen eta zuzendaria oso pozik geratu zen izandako harrerarekin.
Horrez gain, Cormenzanak aipatu zuen bere aiton-amonen gorpuzkiak Urduñako hilerrian dituela eta umea zenean ezagutu zuela hiria.
Proiekzioan Manuela Valles antzezleak ere parte hartu zuen. Aipatu beharra dago Sofia Otero antzezlea ere agertzen dela pelikulan. Basauriko umea famatu bilakatu zen Esti Urresola laudioarraren 20.000 especies de abejas filmean egindako lanari esker.