Zer faktorek dute eragina emakumeek jarduera politiko eta sozialen lidergoan duten parte-hartzean? Zer motatako neurriek susta dezakete emakumeek eremu horietan parte-hartze handiagoa izatea? Ba al dago oztopo sozial, ekonomiko edo kulturalik emakumeek udalerrian lidergo-rolak izatea mugatzen duenik?
Galdera horiei eta beste hainbati erantzun nahi die Urduñako Udalak berriki abiatu duen hiriko genero berdintasunaren egoerari buruzko azterlanarekin. Galdetegi bat sortu dute horretarako, eta bizilagun guztiei luzatu diete erantzuteko gonbita.
Azaldu dutenez, Urduñako “genero-desberdintasunak” identifikatzea dute xede, “berdintasun eraginkorra sustatzeko gomendio espezifikoak proposatzeko”. Izan ere, nabarmendu dutenez, “hainbat alderditan” agertu daitezke genero-desberdintasunak, “hala nola, bizitza politikoan eta sozialean parte hartzean, baliabideak eta aukerak eskuratzean, denbora lanaren eta zaintzaren artean banatzean, eta emakumeek lidergo-roletan parte hartzean”.
Bide horretan, Udalak uste du “funtsezkoa” dela herritarren parte hartzea, horrek ahalbidetuko duelako “egoeraren ikuspegi osatuagoa” lortzea eta “erabaki informatuagoak” hartzea, “genero berdintasuna sustatzen duten politika publikoak diseinatzeko”.