Koroatze jaiekin batera heldu izan da urteotan Urdufolk jaialdia hirira, baina urriko lehen asteburura arte itxaron beharko dute aurten folk zaleek ordura mugitu baitute hitzordua. Urriaren 3an eta 4an, beraz, musika doinu ezberdinez gozatzeko aukera egongo da, bai egunez eta baita gauez ere. Dagoeneko tradizioa den bezala, Asturiaseko El Trasno gaiten bandak emango dio irekiera festibalari, hilaren 3an, ostirala, arratsaldeko 19:00etan arituko baita kalejiran. 21:00etan estreinatuko da, ordea, Foru plazako eszenatokia Antia Muiñoiren kontzertuarekin. Antzinako galiziar kantutegia berritzen du Muíñok, doinu tradizionalak jazz eta pop musikarekin nahastean. Hau ez da izango Muíñok eskualdea zapaltzen duen lehen aldia, ordea, maiatzean Baiuca musikariarekin batera aritu baitzen Amurrioko Aiara Fest jaialdian.
Urdufolk jaialdiak urterik urte, eta geroz eta proposamen gehiago jasotzen dituzte bertan jo nahi duten taldeen eskutik
Galiziarraren ostean, euskal musikariek hartuko dute oholtza, Xabi Aburruzaga trikitilariak bere disko berria aurkezteko lehen geltoki gisa aukeratu baitu Urdufolk jaialdia. Eriz Perez eta Ruben Isasi musikari aiaraldearrek lagunduko dute Aburruzaga taula gainean.
Larunbatean, berriro aterako dira El Trasnoko gaiteroak hiriko kaleak girotzera, 13:30ean. Iluntzean, Belharra taldearen txanda izango da: “bluegrass” musika jotzen dute Donostiako eta Hendaiako musikariek, tartean, Urbil Artolak, Sorotan Beleko gitarra-jotzaileak. Joseba Urruela antolakuntzako kideak adierazi duenez, “lehenengo aldia izango da estilo honetako talde bat arituko dena Urdufolken”.
Aurtengo kartelburuak itxiko du jaialdia: Maruja Limon talde kataluniarrak. Sei neskez osatutako taldea nazioarteko biran murgilduta dago, eta antolakuntzatik nabarmendu dutenez “Afrikatik zuzenean etorriko dira Urduñara” flamenkoa, popa eta erritmo latinoak fusionatzera.
Erreferentzialtasuna irabazten ari da Urdufolk jaialdia urterik urte, eta geroz eta proposamen gehiago jasotzen dituzte bertan jo nahi duten taldeen eskutik, “aurten 600 baino gehiago” izan direla aitortu du Urruelak. Betiko elementuak urteroko sorpresekin tartekatzen dituzte, hortaz, kartela atontzeko orduan.