Urduñako EH Bildu oso kritiko agertu da Udalak ezarriko duen hondakin bilketaren zerbitzuaren %23ko garestitzearekin. Oposizioko taldeak gogoratu du azken urteetan jadanik %60ko igoera egon dela eta EAJk neurririk erosoena hartu duela bestelako aukerak aztertu gabe.
Izan ere, EH Bilduk bi iradokizun egin zituen esparru horretan:
- Edukiontzi marroia erabiltzea, edo organikoa biltzen duen herritarrei tasaren bonifikazioa aplikatzea.
- Kartoia atez ate batzeko izena emanda duen edozein lokal komertziali bonifikazioa ezartzea.
Legea aitzakia, EH Bildurentzat
Koalizioak desadostasuna agertu du udal gobernu taldeak baliatu duen argudioarekin zerbitzuaren kostua igotzeko: "7/2022 Legeak ez du zergak igotzera behartzen; hondakinen sorrera murriztera eta ekonomia zirkularrerantz aurrera egitera behartzen du".
Tasak igotzea, baina birziklapena sustatzea
Horrela, oposizioko taldeak ulertzen du zerbitzua garestitu behar dela ordaintzeko, baina azpimarratu du birziklatzea dela bidea gastua merketzeko. "Zenbat eta gutxiago birziklatu, orduan eta gastu handiagoa" sortzen da, EH Bilduren esanetan.
Halaber, Itziar Biguri bozeramaile duen taldeak aldarrikatu du EH Bilduren gobernuetan aitzindariak izan direla birziklapena sustatzeko orduan eta EAJk gobernatzen duenetik ez duela ezer egin: "Legealdi honetan ez dugu inolako neurririk ikusi birziklatzean aurrera egiteko, zergen igoera baino ez. Ez da egon inolako komunikazio-kanpainik, ezta aurrera-pausurik. Urduñan, aurreko legealdietan, aitzindariak izan gara neurri askotan; lehenak konpostagailuak jartzen, lehenak edukiontzi marroiak jartzen eta lehenengoak edukiontziak erabiltzeko etxebizitza guztiei txartelak banatzen. Saltokietan kartoia atez ate jasotzen lehenak. Baina, legealdi honetan, urratsik ez hondakinen arloan".