Otxomaioetako ezinbesteko zita bilakatu da Mugalde Elkarteak antolaturiko herri bazkaria. Auzolanean eraikia, urtez urte Gernika Plaza lepo betetzen duen bazkaria da. 1999an antolatu zuten lehendabizikoz, eta 2024an ospatu zuten ekimenaren 25. urteurrena. COVID-19aren pandemia tarteko, ordea, aurtengoa izango da 25. edizioa. Edizio borobila. Antolakuntzan murgilduta dira dagoeneko Izaskun Biguri eta Irune Azkarraga, Mugalde Elkarteko kideak.
Hastapenak
Gernika Plazara estu lotua dagoen arren, Foru Plazan ospatu zituzten herri bazkariaren lehen hiru edizioak. “Nolabaiteko sinbiosia sortu zen ekimen herrikoi berria antolatzeko nahia genuen Mugalde Elkartearen eta herriko sukaldari kuadrilla baten artean”, azaldu dio Aiaraldea Komunikabideari Bigurik.
Lehen unetik erabatekoa izan zen arrakasta. Lehenengo edizioan ia 200 lagun elkartu ziren. “Hasiera-hasieratik oso bazkari anitza izan da hau; adin eta kolore politiko guztietako herritarrak bildu izan gara, Urduñan bakarrik gerta zitekeen hau”, aldarrikatu dute elkarteko bi kideek.
Gernika Plazara jauzia
“Logistika” arrazoiek bultzatuta lekualdatu zuten herri bazkaria Foru Plazatik Gernika Plazara. “Euria egin zuen edizio batean, ohartu ginen Foru Plazako hastialak ez zirela aterpe egokia. Oso sakabanatuta daude, eta Gernika Plazan aurkitu genuen horretarako toki egokia”, azaldu du Azkarragak.
Ia berrehun lagunekin hasi zen herri bazkaria bostehun plateren langa gainditua zuen Gernika Plazara lekualdatu zirenerako. Ordutik, hori izan da bazkarian elkartu daitezkeen lagunen muga. “Kopurua ezin dugu gehiago handitu, ez gaitasunik ez dugulako, baizik eta Gernika Plazako aterpeetan jende gehiago sartzen ez delako”, nabarmendu dute antolatzaileek. Azken edizioetan gainera ondo aprobetxatu dituzte Gernika Plazako hastialak, euria eta ekaitzarekin kointziditu du bazkariak eta, baina giroa beti izan da beroa.
Menua
“Bereziki eskertu beharrean gaude sukaldariek hartzen duten lana”, azpimarratu dute Bigurik eta Azkarragak. Lehen platerra, bigarrena, postrea, ardoa, ogia eta bazkalosteko kopa aukeran. Edizio guztietan errepikatu dituzte patatak errioxar erara, bigarren platerak, ordea, aldaketa gehiago izan ditu: arkume saiheskiak, arkume gisatua, haragi gisatua…
Tokiko produktuak lehenesten dituztela azaldu dute antolatzaileek: haragia Urduñako abeltzainei erosten diete, patata arabarra, noski, eta ardoa eta ogia ere hirian bertan erositakoak dira.
Auzolanean eraikia
Baina sukaldariekin bakarrik ezingo litzake neurri honetako bazkaririk antolatu. Guztira 50 lagun baino gehiago batzen dira auzolanera. Askok urtero-urtero errepikatzen dute, eta lanak ondo finkatuta dituzte. Irune Azkarragak uneoro besapean daraman koadernoan urratsez urrats ditu jasoak antolakuntzan kontuan hartu beharreko guztiak. Milimetrikoki neurtutako makineria da. Badira 200 patata kiloak zuritzeaz arduratzen direnak, ogia mozten dutenak, botilak zabaltzen dituztenak, mahaiak jartzen dituztenak, garbiketaz arduratzen den Fairy Komandoa… Bada 500 mahaikideak aulkietan ordenatzeaz arduratzen denik ere.
Gaur bertan jarriko dituzte salgai tiketak, eta azken urteetan bezala, egunean bertan agortuko direla dio Azkarragak: “Eguerdian jartzen ditugu salgai eta goizeko lehen ordutik dago ilara zain”.
Beste edizio arrakastatsu baten atarian da, beraz, Mugalde Elkartearen Otxomaioetako herri bazkaria. Eguraldi ona espero dute antolatzaileek, arkupeetatik atera eta Gernika Plaza alderik alde betetzeko. Edonola ere, eguzkitan zein euripean, auzolanaren su-epelean kozinatutako bazkari ederraz gozatuko dute berriro ere urduñarrek.