Maiatzarekin batera ateak zabaldu ditu berriz ere Urduña Hiria Museoak. Hiru hilabete iraun dituzten lanak amaitu ostean, erakusketa eta ekintza berriak hartuko ditu museoak datozen hilabeteetan.
Hain zuzen ere, hilaren lehenean inauguratu zuten 'Urrutiko Haurtzaro baten Jolasak eta Jostailuak' erakusketa. Manu Alzueta eta Nerea Perez senar-emazteen bildumaren lagin bat egongo da museoan. Azken 35 urteetan, 1960ko hamarkadaz geroztiko 3.000 jolas eta jostailu baino gehiago bildu dituzte. Urrira arte egongo da museoan ikusgai.
Hurrengo larunbatean, maiatzaren 16an, Encarni Lopez artista ugaotarraren Larrua arte erakusketa helduko da museora, eta uztailaren 19ra arte bisitatu ahalko da. Horrez gain, hilabete amaieran Jose Maria Pinto Rey Artziniegako margolariaren obra ikusgai jartzea espero dute.
7. urteurreneko ospakizuna
Urduña Hiria Museoak zazpi urte beteko ditu aurten eta hori ospatzeko ekitaldi berezia prestatu dute. Zehazki, Laudioko Bi Hotsak abesbatzak emanaldia eskainiko du maiatzaren 15ean, Otxomaio jaien egitarauaren baitan. Harresi barruan izango da emanaldia, eta euria eginez gero parrokiara lekualdatuko da.