Efemeride berezia bizi izan zen atzo Urduñan. Izan ere, Otxomaio jaien bigarren txanparen hasiera izateaz gain, Orduña Hiria Museoaren 7. urteurrena ere izan zen, eta gainera 144 urte bete ziren museoaren eraikinaren lehen harria jarri zenetik.
Urteurren bikoitz hori ospatzeko kontzertua eskaini zuten iluntzean. Harresian egitea zen hasierako asmoa, baina elizara mugitu zuten azkenean, eguraldiaren ondorioz. Hala ere, ehunka lagun bertaratu ziren Bi Hotsak taldearen emanaldiaz gozatzera.
Klimatizazio-lanak amaituta
Azken hiru hilabeteetan itxita egon da museoa, klimatizazio-lanak egin baitituzte bertan, Europako funtsak baliatuta. Iker Santocildes alkateak goraipatu du obra guztia kanpo finantziazioaren bidez egin dela, "udalaren aurrekontua ukitu gabe". Modu horretan, nabarmen hobetu da eraikinaren energia-kalifikazioa, eta argindarraren gastua %71 murriztu da.
Obra amaituta, irekita dago berriz museoa, eta horrek aukera emango dio orain arte lortu duen arrakastari eusteko. Izan ere, iaz ia 10.000 bisitari izan zituen, 13 erakusketa antolatuta (museoan modu finkoak dauden bildumez harago). Gainera, 850 bazkide ditu dagoeneko Hamaika Kale elkarteak kudeatutako espazioak.