Urrats berria eman du Urduñak ikus-entzunezkoen alorrean. Mundo Cero ekoiztetxeak espazio fisikoa atondu du La Antigua etorbideko eraikin batean: Mundo Cero Etxea. Iragan ostiralean aurkeztu zuten proiektua, eta "ikus-entzunezkoen prestakuntza, sorkuntza eta postprodukzioari eskainitako gune berri" gisa definitu zuten.
Aurkezpenean izan ziren, besteak beste, Ibon Cormenzana Munco Cero ekoiztetxeko burua eta Ainara Basurko Bizkaiko Ekonomia Sustapeneko foru diputatua. Proiektu berriaren helburua "sektore zinematografikoa garatzen laguntzea, talentua sustatzea eta landa ingurunean aukera ekonomiko eta enplegu berriak sortzea" dela aldarrikatu zuten biek ala biek.
"Inpaktu sozialeko ekoiztetxe" gisa definitzen du bere burua Mundo Cerok, eta filosofia horri ekarpena egitera dator Urduñan abian jarritako zentroa. "Mundo Cero Etxea tokiko eta nazioarteko talentua sustatzeko bokazioarekin sortu da, hezkuntza jarduerak, sormen egoitzak eta ikus-entzunezko proiektuak babestu eta laguntzeko", azaldu zuten aurkezpenean.
Mundo Cero Etxea
Honezkero abian dago Mundo Cero Etxeko formakuntza-jarduera: "Datozen asteetan, zentroak profesional ezagunek eskainitako tailer berriak hartuko ditu, hala nola Pablo Berger zinemagileak eta AA eta storytellingean aditua den Victor Gay Zaragoza, eta, laster, funtsezko arloetako prestakuntzak gehituko zaizkie ere: soinua, Fabiola Ordoyoren eskutik, eta muntaketa, Guillermo de la Calekin, besteak beste".
Urduñara talentua erakartzeko baliatu nahi dute proiektua, "gizartean eragina izango duen ikus-entzunezkoaren inguruko ikaskuntza, sorkuntza eta truke ingurune bat sortuz".
Ikus-enztuenzkoen Hub-a
Bizkaiko Foru Aldundiak iragan martxoan iragarri zuen Bilbao Bizkaia ikus-entzunezko huba garatzeko 4,6 milioi euroko inbertsioa. Mariaren Lagundiko ikastetxe zaharreko eraikinak eta lursailak egokituko dituzte sektorearen garapena bultzatzeko, 18.000 metro koadroko eraikina eta 10.000 metro koadroko lursaila orotara.
Ekosistema horretan ekarpena egitera dator Mundo Cero Etxea. “Urduñarentzat proiektu hau aukera bat da udalerriko jarduera ekonomikoa eta kulturala dinamizatzeko, gure hiria sektore estrategiko bati lotuz eta herritarrentzat aukera berriak sortuz”, adierazi zuen Iker Santocildes alkateak iragan ostiraleko aurkezpenean.