"Surrealistatzat" jo du Iker Santocildes Perezek Urduñako igerilekuekin gertatutakoa. Urduñako alkateak gaiari buruzko azalpenak eman zituen Aiaraldea Komunikabidearen Azalera podcastean. Bere hitzetan, ezusteko egoera bati egin behar izan zioten aurre igerilekuen kudeaketarako kontratatutako enpresaren jabea atxilotua izan zenean. "Udalak izapide guztiak garaiz eta modu egokian egin zituen, baina enpresak azken unean eta bere borondatez ezin izan zuen hartutako konpromisoa bete", azaldu du gobernuburuak.
"Zerbitzu juridikoak gertatutakoa aztertzen ari dira une honetan. Kontratua, hartutako konpromisoak eta zor litezkeen erantzunkizunak aztertuko dira eta interes publikoaren defentsan dagozkion neurriak hartuko dira"
Dena den, Santocildesek nabarmendu du "oso azkar" erantzun zutela, hurrengo astelehenean ireki ahal izan zituztelako igerilekuak. Behin egoera normalizatuta, enpresa horren aurkako neurri legalak hartuko dituztela baieztatu du alkateak: "Zerbitzu juridikoak gertatutakoa aztertzen ari dira une honetan. Kontratua, hartutako konpromisoak eta zor litezkeen erantzunkizunak aztertuko dira eta interes publikoaren defentsan dagozkion neurriak hartuko dira".
Igerilekuetako obrak
Gorabeherak gorabehera, igerilekuetan egin nahi dituzten obrei buruzko zertzeladak ere eman zituen alkateak Azalera podcastean. Izan ere, maiatzeko plenoan onartu zuten proiektua. "Helburua ez da soilik instalazioak berritzea, baizik eta Urduñak, etorkizunera begira, behar dituen igerileku modernoak, irisgarriagoak eta seguruak izatea", azaldu zuen gobernuburuak, aurrekontua milioi bat euro baino gehiagokoa dela gaineratuta. Gauzak hala, beharrezko finantzaketa bilatzeari ekin diote "proiektua errealitate bihurtzeko", datorren urtean abiatu nahi baitituzte obrak.