Bi emanaldi berezi eskaini ditu Urmugaren Urtanta ekimenak Aiaraldean. Ostiral arratsaldean Artomañan egon ziren Et Incarnatus Orkestrako kideak kontzertua eskaintzen. Larunbatean, aldiz, Urduñara mugitu ziren. Kontzertua Santutegiko aurreko lorategietan egitea zuten aurreikusita, baina alboko komentuko arkupeetan egin zuten azkenean, eguraldi txarra dela medio.
Erromeria izan zen emanaldiaren ardatza. Gorka Hermosa soinujoleak egin zuten sarrera, filma labur bat grabatu baitu Zumagarragako trikitiari buruz. Instrumentu hori Euskal Herrira nola iritsi zen azaldu zuen, eta nola uztartu zen erromerietan txistu, alboka, pandero eta akordeoiarekin. Horri lotuta, gaineratu zuen Kepa Junkerak instrumentu hori eraldatu zuela, beste musika mota batzuekin uztartuz.
Aipamen hori ez zen ausazkoa izan, trikitilari ospetsua baitzegoen publikoaren artean, ohorezko gonbidatu moduan. Txalo zaparrada luzea eskaini zioten musikariari, eta bere kanta ezagunenetako bat jo zuten, eskualdeko trikitilari, txistulari, panderojole eta albokarien laguntzarekin, Aitor Aspuru, Lander Otaola ‘Txato’ edota Oier Rebolledo tartean. Horrez gain, Arrastariako entradillei ere egin zieten keinu.
Urtantak ekimenaren azken bi etapak izan dira Aiaraldekoak. Euskal Herriko zazpi probintziak bisitatu ditu ekimenak azken asteetan.