Orruño kaleko jaiek bizilagun ugari erakarri dituzte asteburuan zehar, izan herrigunean zein San Roman baselizaren inguruetan. Izan ere, ermita Zedelika eta Ripa artean dagoen arren, alde zaharreko jai horren patroia da San Roman, Arkaitz Ortiz de Zaratek azaldu duenez.
Hortaz, larunbatean Urduñako herrigunean eta igandean ermita inguruan, hainbat lagunek parte hartu dute antolatutako ekintzetan. Zehazki, jaiak larunbateko eguerdian abiatu zituzten, eta trikipoteoaren ostean, herri bazkaria egin zuten. Arratsaldean, mus txapelketa, haurrentzako jolasak eta buruhandiak izan zituzten. Iluntze aldera, txokolatea banatu, bingora jolastu eta DJ Juanmaren musikaren erritmora dantzatu zuten, eguna zezensuzkoarekin amaitu baino lehen.
Gaur, ordea, Zedelikako San Roman baselizara mugitu da herritar margoa. Meza egin dute bertan, eta mokadua egon da ostean bertako zelaietan, txistularien musikaz alaituta. Ospakizunekin amaitzeko, porroitik edateko IV. lehiaketa eta II. tiragoma txapelketa jokatu dituzte, parte-hartze handia eta publiko are jendetsuagorekin.