Arando Korrikalari Elkarteak antolatzen duen Urduña Hiria Herri Krosaren XX. edizioa ospatuko dute igandean, irailak 27, goizeko 11:30ean. Gaur goizean egin dute kirol probaren aurkezpena. elkarteko kideek eta Uxue Mendibil zinegotziak eta Iker Santocildes alkateak hartu dute parte bertan, eta biek ala biek hitzorduaren izaera herrikoia azpimarratu dute, krosaren arrakastaren giltzarri.
Javi Apariciok, Arando Korrikalari Elkarteko kidea eta krosaren egungo ereduaren sortzailea, balioan jarri du azken 22 urteetan egindako bidea. Aparicio "pozik" azaldu da kirol probak izan duen garapenarekin eta adierazi du "orain arte lortutakoa mantentzea" dutela erronka, "Urduña Hiria Herri Krosak beste 20 urtez aurrera jarrai dezan".
Orain arte lortutakoa mantentzea da Arando Korrikalari Elkarteak duen helburua krosaren 20. urteurrenean, baina emakumeen partaidetza bultzatzen jarraitzea beharrezkotzat jo dute, baita belaunaldi aldaketa antolakuntzan
“XX. ediziora iristea ospatzekoa da, baita proba honen atzean dagoen lan guztia aitortzeko aukera bikaina ere. Hogei urte baino gehiagoko konpromisoa erakutsi duen AKT zoriondu nahi dugu, eta eskerrak eman ere edizioz edizio lasterketa hau posible egiten lagundu duten pertsona guztiei. Herri Krosa adibide garbia da erakusteko nola elkarte baten lanak, hiritarren inplikazioarekin batera, kirol-ekimen bat hitzordu egonkortu eta udalerriaz gaindiko irismeneko bihurtu daitekeen”, nabarmendu du Uxue Mendibil Kultura zinegotziak.
Herri Krosak garatutako ereduarekin pozik dauden arren, etorkizunera begira ere erronkak badituztela aldarrikatu dute antolatzaileek. Marta Samaniego Arando Korrikalari Elkarteko kideak emakumeen parte hartzea indartzen jarraitzeko urratsak ematearen beharra nabarmendu du, bai eta antolakuntzara belaunaldi berriak batzearen beharra ere.
Lasterketa anitza
Mota guztietako kirolarientzako krosa dela aldarrikatu du Samaniegok. Badira hiru urte 10 kilometroko lasterketari 6 kilometroko proba gehitu ziotela, "lasterketa herritar gehiagorengana hurbiltzeko". Bigarren distantzia horrek are gehiago indartu du Herri Krosa, eta urtez urte geroz eta kirolari gehiagok ematen dute izena.
Proba paralinpikoa ere jarri nahi izan dute balioan Apariciok eta Samaniegok, Herri Krossak kirol egokituarekin duen konpromisoaren erakusle. Bide horretan Javi Conde Klub Paralinpikoaren parte hartzea eskertu dute antolatzaileek. Basaurin egoitza duen klubak 30 atleta baino gehiago elkartzen ditu Urduña Hiria Herri Krossean, tartean tokiko kirolaria den Olaia Gurrutxaga.
Azkenik, kirolari txikienentzat prestaturiko Txikikrosa eta Minitxikis probak ere nabarmendu nahi izan dituzte.
Dena prest igandeko hitzordurako
Dagoeneko dena prest dute igandeko kirol probarako. Izen emateak erritmo onean doazela adierazi du Samaniegok eta azken urteetako kopuruak aurreikusten ditu XX. edizio honetarako ere. Guztira 750 kirolari baino gehiago elkartuko ditu hitzorduak, kategoria desberdinetan banatuta.
Oraindik ere izena emateko epea dagoela azaldu dute. Kirolprobak webgunean eskuratu daiteke dortsala. Aurrez aurre izen emateko aukera egongo da ere, bihar eta etzi (irailak 24 eta 25), Urduñako Alondegian.
Kirol probatik haratago, "igandea jai-egun bat izatea" espero dute antolatzaileek, eta horretarako tabernen kolaborazioa eskertu dute. Gainera, Bizi Urduña elkarteak antolatuko duen Merkataritza Azokaren bat egingo du Herri Krossak.