Patxita Etxea izenarekin ezagutzen den eraikinean osasun zerbitzu berria prest du Luiaondok. Kontsultategia martxan jarriko dute maiatzaren 17an, asteartean. Hala ere, hurrengo asteazkenean, hilak 11, herritarrentzako ate irekien jardunaldia egingo dute instalazio berriak ikus ditzaten.
Eraikinaren beheko solairua bideratu dute osasun zerbitzura. 200 metro karratuetan itxaron gela, eskaerak kudeatzeko harrera espazioa eta hiru kontsulta egongo dira, erizaintza lanetarako bat eta medikuentzako bi. Mediku egoiliar batek erabiliko du bietako bat. Gainera, erabilera anitzeko beste bi espazio egin dituzte. Horietako bat odol-ateratzeak egin edo txertoak jartzeko izango da eta bestea taldeko heziketa ekintzak gauzatzeko, diabetiko edo asma dutenei zuzendutako saioak kasu. Medikuek erabiltzeko biltegia eta aldagela ere badaude, komunez gain. Espazioa egokituta dago eta guztiz irisgarria da. Etxearen atzealdean aparkalekua eta anbulantzietarako gune berezia ere egokitu dute.
Luiandoko familia medikua den Roberto Gonzalezek azpimarratu du "hobekuntza handia" ekarriko duela espazio berri honek Aiarako osasun zerbitzura. "Aurretik, Gizarte Etxearen parean zegoen kontsultategian, galdera bat egin eta kaletik den dena entzuten zen. Eskaerak kudeatzeko espazio berriak pribatutasuna bermatzen du". Yolanda Carro erizainak azaldu duenez, "lehen ez zegoen espazio nahikorik Luiaondoko jende guztiarentzat. Orain espazioa lan egiteko askoz erosoagoa da". Gune berriarekin "oso pozik" dauden arren, Carrok azpimarratu du zerbitzuak hobetzeko asko duela oraindik, "Luiaondon familia gazte asko daude eta ume ugari dago. Pediatra baten beharra dugu".
Botikin zerbitzua
Eraikin horretan kontsultategia jartzeko proiektua 2009an hasi zen, Udalak espazioa erosi zuenean. Guztira 1.100.000 euroko gastua suposatu dute erosketak eta egokitzapen lanek. Zifra horri aurre egiteko, Osakidetza, Lan eta Zerbitzuen Foru Planaren zein irisgarritasun diru laguntzak izan ditu Aiarako Udalak.
Hala ere, oraindik egitekoak daude. Patxita Etxearen parean zaharkiturik dagoen eraikin txikia eraitsiko dute hurrengo hilabeteetan eta bertan botikin zerbitzua ere jarriko dute, Arespalditzako botikak eskainiko duena. Gainera, kontsultategi berri horren aurretik igarotzen den espaloiak 2 metroko zabalera izan dezan lanak egingo dituzte.