Aiara eta Gorobel Mendizerraren Antzinako Ermandadea joan den maiatzaren 26an bildu zen Burgosek Gorobelen egindako itxierei buruz hitz egiteko. Bertan, Gaztela eta Leongo Juntaren eta Arabako Foru Aldundiaren artean egindako akordioaren zirriborroa onartu zen eta Gorobelen ganadua kontrolatzeko enpresaren kontratazioa adostu zen.
Bileraren lehenengo puntua Aiarako eta Burgoseko erakundeek apirilean izandako bileraren inguruan informatzea izan zen. Gainera, ermandadearen eta Burgoseko Batzordearen arteko akordioaren zirriborroa ere onartu zen. Azken hau Gaztela eta Leongo Juntaren eta Arabako Foru Aldundiaren artean egindakoa da.
Ganaduaren erregularizazioa
Bestalde, Lastras de Teza eta Teza de Losa udalerriek ganadu kopurua erregulatzeko aurkeztutako eskaintza ere aztertu zen. Bazken ustiapen legeak esaten duen arabera, Aiarako abereek lursail horietan bazka dezakete eta horregatik hain zuzen ere, Burgoseko hainbat udalerrik proposamen bat esleitu dio anaiarteari. Bertan, ganadu kopurua, datak eta bazka egin dezaketen mendiak aipatzen dira, besteak beste. Neurri hau behin-behinekoa izango litzateke, izan ere, azken urte hauetan ganadua eta bazken ustiapena erregulatuko duen araua egiten ari dira erakundeek.
Arau hori lortzeko aurrera pausuak emateko nahian, Gorobel Mendilerroan bazkatzen duen ganadua kontrolatzeko zerbitzua kontratatzea erabaki zen bileran. Gainera, Neiker enpresak Mendilerroaren Kudeaketa Plana egitea adostu zen eta Aialurrek egindako ganadu kopuruaren analisia aztertu zen.