Aurtengo ziklokros denboraldian agintzen ari da Aiala Txirrindularitza Elkartea kadeteen artean. Horren adibidea izan zen pasa den asteburua. Aiararrek Beasain eta Zornotzan irabazi zuten larunbatean eta igandean, hurrenez hurren. Hain zuzen, Gipuzkoan Asier Beraza izan zen lehena sailkapenean eta, Bizkaian, ordea, Hodei Muñoz.
Baina hori ez zen izan albiste on bakarra. Arespalditzarrarekin eta luiaondoarrarekin batera txirrindulari gehiagok lortu zituzten emaitza bikainak. Beraza bigarren izan zen Zornotzan, eta han ere bosgarren eta seigarren sartu ziren helmugan Iñigo Uria eta Erlantz Alday, hurrenez hurren. Bigarren sailkatua Beasainen, aldiz, Oier Colmenero izan zen.
Taldeko prestatzaileek, edonola ere, nabarmendute dute talde osoaren lorpena izan dela, guztiek egin baitute lan zentzu berean eta nabarmentzeko moduko maila erakutsi dute. Nola ez, eta merezimendu osoz, taldeko saria Aiarara eraman zuten txirrindulariek.
Alcobendas eta Lezama asteburuan, geroago Ibaguen
Gauzak horrela, ziklokros taldeak bi hitzordu ditu asteburuan. Alde batetik, Lezaman egongo dira larunbatean. Bestetik, igandean Alcobendasera joko dute Asier Berazak, Hodei Muñozek eta Iñigo Uriak, Espainiako Kopan lehiatzeko. Horretarako emaitza onak eskuratu zituzten Galizian, Laudion eta Karrantzan.
Hodei Muñozen kasuan, azpimarratu behar da duela pare bat aste mina hartu zuela Laudioko ziklokrosean, baina orkatilan izandako lesioa ez da eragozpena izan Zornotzan irabazteko.
Taldeko arduradunek uste dute aurtengo arrakastak baduela zerikusirik klubak egindako apustuarekin ziklokrosaren esparruan duela 15 urtetik gaurdaino. Hori dela medio, irrikaz itxaroten ari dira Aiaran, etxean, egingo duten lasterketa. Ibaguen herrian izango da zita, abenduaren 26an.