Euskaraktibatu Aiaraldea! leloarekin, eskualdeko euskalgintzak, Aiarako Udalak eta Aiarako Kuadrillak indarrak batuko dituzte ekainaren 4an Luiaondon euskara ardatz izango duen jaia antolatzeko.
Berez, egitaraua 11:00etan abiatuko da, baina giroa berotzeko oinez joatea proposatu dute Aretako Kultur Etxetik 9:00etan, Laudioko tren geltokitik 9:15ean, Faktoriatik 9:25ean eta Amurrioko Iparraldeko geltokitik 9:30ean. Bizikleta erabiltzea nahiago dutenek bi aukera izango dituzte joateko: 9:00etan Urduñako Foru plazatik abiatzea menditik joateko eta 10:00etan errepidetik egitea nahiago badute. Trenez garraiatzeko parada ere egongo da.
Ideia da 11:00etan Luaiondoko iparraldeko eta hegoaldeko sarreretan elkartzea eta ospakizunean buru-belarri sartzea. Izan ere, gune ugari eta eskaintza anitza prestatuko dituzte. Goizean saskibaloi eta futbito txapelketak, kultura azoka, umeentzako ekintzak (jolas zirkuitua, 0-3 urteko haurren gune gozoa, ginkana, puzgarriak, ohe elastikoa, betiko jolasak) eskainiko dituzte. Aiaraldea Komunikabideak ere bat egingo du egitasmoarekin, zuzeneko emisioa eskainiz.
Eguerdian Tabernaria: Instrukzioak botatzeko ondo kaña bat antzezlanaren bi saio egingo dituzte, 12:00etan eta 13:30ean. Patxo Telleria da ikuskizunaren gidoiaren egilea da eta Mikel Martinez aktorea protagonista. 12:00etan Euskararen Bila jolasa abiatuko dute eta 12:30ean ikastetxeetan antolatutako bideo laburren lehiaketako sariak banatuko dituzte. Gauza bera egingo dute 13:30ean, baina kirol txapelketetan parte hartu duten taldeekin.
Mezua eta dantza
Egitasmoa artikulatuko duen ekitaldia 13:00etan gauzatuko da. Bi elementu nagusik osatuko dute. Alde batetik, ekimenaren mezua. Bestetik, koreografiaren dantza, Izaskun del Cerroren parte hartzearekin.
Horren ostean, ekintzek astinduko dituzte berriro guneak. Esaterako, 13:30etatik 16:00ak arte herri bazkariaz gozatzeko tartea emango dute, 8 euroren truke.
16:00etan gazteentzako ihes gelaren hiru saioei emango diete hasiera eta 18:15ean bertso poteoari ekingo diote, Julen Zelaieta, Izar Mendiguren eta Sustrai Colinaren kantekin.
15:00etan kontzertuak hasiko dira. Lehenik eta behin, Ilargi folk-rock taldearen txanda helduko da. Gero Saltokan dantza plazak hartuko du oholtza 16:00etan, eta 18:15ean Muganek pop-folk doinuak jarriko ditu. 19:30ean Xsakara artistak trap musika eramango du Luiaondora eta 20:45ean Izatefaltsuak talde aiaraldearrak metal kontzertua eskainiko du. Musika eskaintza borobiltzeko, Nikotinak rapa, reggaea eta dance-halla nahastuko ditu 22:00etan.