Azken bi urteetako mailari eutsi nahi diote Luiaondoko Jaietan. Pandemiak mundua eten aurretik arrakasta handia bereganatu zuten jaiek, bereziki 2018 eta 2019 urteetan. Jaien antolakuntzaren atzean dagoen Administrazio Batzarreko kideek argi daukate arrakastaren arrazoia: “Herriko gazteen proposamenak entzun eta aintzat hartzen hasi ginen. Urtero bilera irekiak antolatzen ditugu jaien egitaraua diseinatzeko eta bertara gonbidatu genituen gazte luiaondoarrak”.
Aurten ere, eredu berdina jarraitu dute, eta espero dute azken urteek utzitako zapore onaz berriro ere gozatzea. “Akerbeltz erromeria, Erruki eta Zutik taldeak edota Dj Alex eta Dj Gomi dira aurtengo programako musika eskaintzaren adibideetako batzuk, denak herriko gazteen proposamenetatik etorriak, eurak dira eszena musikala hobekien ezagutzen dutenak”. Aurreratu dutenez, gainera, goizeko ordu txikiak arte luzatuko dute jai-giroa, festa amaierak aldirietako lehen trenarekin kointziditu dezan.
Adin guzteintzako jaia
Baina, gazteentzako soilik ez, herritar ororentzako egitarau zabala prestatu dute Administrazio Batzarreko kideek, Jaietako Txosna kudeatuko duen koadrilarekin elkarlanean. Gaztetxoenek jolas parkeaz, herriko txokoak ezagutzeko ginkanaz edota Fifa bideo-jokoaren txapelketaz gozatzeko aukera izango dute. Nagusienek, ordea, egun propioa izango dute uztailaren 24an: “Atzoko gaztearen eguna”.
Horrez gain, herri bazkariak, pilota partidak eta bola tiradak ere izango dira Luiaondoko jaietako ezinbesteko osagai.
Luiaondon bada giroa
Luiaondoko auzokideak elkartu eta ondo pasatzeko helburua dute jaiek, baita herri sentimenduan sakontzekoa ere: “Zentzu horretan oso positiboa da herriko gazteek beste nonbaitera joan aurretik Luiaondon geratu nahi izatea”. Halaber, aurten ekimen berria jarriko du martxan Administrazio Batzarrak, etxez etxe banatuko dituzte Luiaondoko jaien banderolak, jaiak iraun bitartean herriko balkoiak apaintzeko: “Herritarrek etxeko buzoian aurkituko dituzte banderolak datozen egunetan”.