Hodei Muñoz txirrindulari aiararrak Munduko Ziklo-kros Txapelketan neurtuko ditu indarrak igandean 11:00etan, junior kategorian, hain zuzen. Horretarako, Herbehereetaraino joko du, Hoogerheide hirira, zehazki.
Aiaraldea Komunikabidea kirolariarekin jarri da harremanetan eta Muñozek aipatu dio ez dagoela, zentzu batean, bere sasoirik onenean: "Txarto egon naiz eta mukiak ditut".
Lehen 20 sailkatuen artean bukatzea da Hodei Muñozen helburua asteburuan Herbehereetan.
Hala ere, txirrindulariak konfiantza dauka bere aukeretan, "etxeko lanak egin baititut aurretik", argitu du.
Hodei Muñozen helburua lasterketa lehen 20 sailkatuen artean bukatzea izango da, nahiz eta zaila izango den: "Munduko onenak egongo dira eta bakarrik horregatik pozik nago. Egiten dudana eginda ere, pozik egongo naiz. Dena den, hil arte borrokatuko naiz".
Munduko Txapelketan parte hartzeko selekzio batek hautatu behar du txirrindularia, ez baita kluben bitartez lehiatzen. Muñozen kasuan, Espainiako hautatzailea Pascual Momparlerek aukeratu du, eta ez da arabar bakarra izango. Hain zuzen, junior kategorian Gorka Corres izango du alboan. Denboraldi honetan Corres eta Muñoz nor baino nor ibili dira hainbat lasterketatan, Amurrion edo Xativan, kasu.