Uztailean Luiaondon ospatutako jaiei segida emango diete Santo Domingo eta San Lorentzo jaiek, eta herriko baselizetara lekualdatuko dute festa-giroa.
Bihar -abuztuak 8- hasiko dituzte festak, Santo Domingo ermita inguruan. 12:00etan meza nagusia egingo dute Domingo Deunaren ohorez. Jarraian bermuta eta haurrentzako jolasak egingo dituzte. 14:30ean herri bazkarian elkartuko dira bizilagun guztiak, eta briska txapelketarekin eta adin guztientzako jolasekin girotuko dute bazkalostea.
Aldarrikapenerako tartea ere izango dute. 19:30ean elkarretaratzea egingo dute "Erasorik ez erantzunik gabe!" lelopean. Luiaondoko jaietan jazotako eraso matxista eta arrazista salatuko dute horrela.
21:00etan odolosteak banatuko dituzte eta Ganeko erromeriak kontzertuari ekingo dio. 23:00etan Sospechosodespam musika jartzaileek jai-giroa luzatuko dute, umore ona ardatz.
San Lorentzo
Abuztuaren 10ean San Lorentzo ospatuko dute Luiaondoko biztanleek, izen bereko ermitan. 11:00etan emango diote hasiera egitarauari tortilla eta pintxo lehiaketarekin. 12:00etan Lorentzo Deunaren omenezko meza egingo dute, eta 14:30ean herri bazkaria, baselizako zelaian.
Bazkalosterako tute txapelketa prestatu dute, baita azken urteetan hain arrakastatsua izan den haurrentzako ur-txirrista ere. 18:00etan jolasak egingo dituzte eta 19:30ean bingoa. Ingurua girotzen Etxebarria aita-seme trikitilariak arituko dira. 21:30ean txintxorta banatuko dute, eta 22:00etan Ganeko erromeriak ikuskizuna errepikatuko du.