Etxaurren Ikastolako Guraso Elkarteak mobilizazioak abiatuko ditu bihar bertan eskola garraio publikoaren arazoen ondorioz. Izan ere, Aiaran kokatutako ikastetxeak udalerri horretako eta Okondoko umeak hartzen ditu eta ikasleen %98ak du garraioaren beharra.
Gauzak horrela, Guraso Elkarteak ziurtatu du gaurko eguna "kaotikoa" izan dela. Izan ere, sei ibilbidetik, bakarrean agertu da autobusa umeen bila.
Ondorioz, elkarteak gaur bertan egin du bilera udal ordezkariekin eta adostu dute bihar gurasoek autoz eramango dituztela umeak eskolara. Horrek suposatuko du dozenaka autok ilara arazoak sortuko dituztela, Luiaondo, Okondo edota beste herrietatik.
Astelehenean, aldiz, gurasoek ez dituzte eramango haurrak eskolara, asistentzia greba eginda.
Azkenik, asteartean gurasoek berriro garraiatuko dituzte adingabeak eta errepidearen alboan mobilizazioa egingo dute.
Zehazki, euren aldarrikapena izango da Eusko Jaurlaritzak eskola garraioa esleitzea aurreko ikasturtearen amaieran, eta ez hastear dagoenean. Izan ere, oztopo berak topatu dituzte bigarren urtez jarraian.