Aiarako Udalak bultzada berria eman dio mugikortasun arazoak konpontzeko saiakerari eta bi ekimen zabaldu ditu horretarako. Hasteko, bihar sinadura bilketarekin jarraituko dute Malato Supermerkatuan 11:00etatik 14:30ak arte.
Udalak nabarmendu du herritar batzuek sinatu dutela soilik Renfeko tren azkarrek (Civis deiturikoak) Luiaondon geltokia izan dezaten eta ez L15 eta L16 lineetako Alavabuseko ibilgailuak Luiaondon gera daitezen, eta baita alderantziz ere. Halaber, aiarar batzuek ez dituzte datu guztiak eman sinadurarekin. Hori guztia konpontzeko egongo dira prest bihar.
Renferen inkesta
Gainera, beste bide bat urratu nahi du tokiko erakundeak Renfek berak irekitako aukerarekin. Izan ere, garraio enpresa publikoak inkesta jarri du eskuragarri C-3 lineako ordutegi aldaketei buruz, hemen sakatuta bete daitekeena.
Galdetegiak proposatzen die erabiltzaileei baloratzea zer nolako eragina izan duten ordutegi aldaketek eta, Aiarako Udalaren aburuz, ataka hobezina da azaleratzeko Luiaondon sortu duten arazoa.
Izan ere, tren azkarrek ez dutenez geltokirik Luiaondon, 07:30ak aldera igarotzen zen zerbitzua ez dago erabilgarri eta jende askok uko egin behar izan dio trena erabiltzeari, ez delako garaiz heltzen lanpostura edo ikastetxera.