Geroz eta gertuago daude Aiarako jaiak eta aurtengo kartela hautatzeko lehiaketa abiatu du Udalak. Aiaraldean erroldatuta dagoen edonork parte hartu ahal izango du, eta ostegun honetara arte, hilak 27, egongo da lanak aurkezteko aukera.
Hiru kategoria planteatu ditu Udalak, adinaren araberakoak:
- 14 urtetik gorakoen kategoria. Saria: 300 euro.
- 10-14 urte bitartekoen kategoria. Saria: 60 euroko opari txartela.
- 10 urtetik beherakoen kategoria. Saria: 60 euroko opari txartela.
Lehiaketaren oinarriak
Kartel lehiaketan parte hartu nahi duen egile bakoitzak nahi beste proposamen aurkez ditzake, beti ere lema ezberdinak erabiltzen badira, jatorrizkoak eta aurretik argitaratu gabeak badira eta aurretik saririk jaso ez badute. Era berean, zehaztu dute ez direla marrazki ez mezu sexista, xenofobo ezta arrazistak dituzten diseinuak onartuko. Aldiz, hizkuntza eta irudi inklusiboak erabiliko dira, eta emakumeak eta gizonak modu berdintsuan erakutsi beharko dira.
Lanak sinatu gabe aurkeztuko dira Aiarako Udalaren bulegoetan (Arespalditzan eta Luiaondon), eta gutun-azal batean honako hauek sartu beharko dira: Alde batetik, aurkeztutako lanaren lema; eta bestetik lana aurkezten duen pertsonaren identifikazio eta harremanetarako datuak, alegia, izen-abizenak, NAN/AIZ, jaioteguna, posta elektronikoa eta harremanetarako telefono-zenbakia.
Epaimahaia alkateak, Kultura Batzordeko bi kidek, Etxaurren Ikastolako guraso elkarteko ordezkari batek eta Llantenoko Arte Eskolako kide batek osatuko dute.
Aurkezten diren kartelek bete beharreko ezaugarri teknikoak eta bestelako oinarriak, Aiarako Udalaren webgunean kontsultatu daitezke, hemen.