Oraindik azken prestaketak guztiz amaitu ez badituzte ere, Luiaondon madalenak nola biziko dituzten argi daukate herrian eta hori musikaz eta jardueraz gainezka izango da.
Uztailaren 18an bertan zabalduko da jaia herrian eta horretarako ohiko formulari eutsiko diote. Izan ere, kalejirarekin eta txupinazoarekin abiatuko dute egitaraua. Musika herriguneko toki ezberdinetatik zabalduko dute eta eskola zaharren balkoitik jaurtiko dute suziria. Gero, gogor jarraitzeko, Beranduegi erromeriak joko du 23:00etan eta dantzatzeko gogoa agortu ez dutenentzat DJ Varrok hartuko du lekukoa 02:30ean.
Hurrengo egunean goizetik ekingo diote herria animatzeari eta 11:00etan bola jaurtiketaren unea helduko da, 13:00ak arte. Errotuta dagoen kirol herrikoiaren txanda ez da eguerdian amaituko eta arratsaldez ere bolan jokatu dute, 17:00etatik aurrera. Edonola ere, ez da hori kirol jarduera bakarra izango, pilota partidak ere egongo baitira ordu berean frontoian. Ariketa fisikoaren ondoren, indarrak berritzeko ordua izango da 21:30ean, odoloste janarekin. Behin pilak kargatuta, berriro gau luzea eta bizia proposatuko dute Akerbeltz erromeria taldearekin 23:00etan eta DJ Blessiveren saioarekin 02:30ean.
Uztailaren 20an Txosna Eguneko ekintza gehienak ez dituzte zehaztu, baina jadanik badakite Txapela Bravak berotuko duela gaua 21:00etatik aurrera. Aipatu beharra dago erromeria talde hori aurten osatu dutela eta jadanik Aiaran jotzea zer den badakitela, Arespalditzan egon baitziren maiatzean. Hala ere, abesti herrikoiak eta dantzagarriak eramango dituzte Luiaondora ere, eta musika ez ezik, umorea ere gehituko diote menuari.
Jaiek adin oroko herritarrei egingo diete tokia eta filosofia horrekin bat, Haur Eguna izango da 21ean. Umeentzako gozamenerako parkea prestatuko dute frontoian.
Azken eguna uztailaren 22a izango da eta ohiturari jarraiki meza egingo dute eguerdian. Tradiziotik at, 18:00etan motorrak berotzeko ardura Etxebarria aita-seme trikitilariek hartuko dute —Unai Etxebarriaren bigarren emanaldia izango da hori, Txapela Bravarekin arituko baita bi egun lehenago—. Azkenik, 19:30ean itxiera bikain bezain klasikoa helduko da Joselu Anayaken kontzertuari esker.
Gogoratu beharra dago jaietako enigma guztiak ez dituztela argitu oraindik antolatzaileek. Izan ere, litekeena da Txosna Egunean jarduera gehiago egotea eta aurtengo dama nor izango den ere erabaki behar dute, bere esku utzi behar baitute giroa pizteko eginkizuna, bonboaren doinua eraginda.