Llantenoko jaiak izango dira asteburuan eta antolatzaileek badakite ez dela jendea faltako, gutxienez, larunbatean 20:30ean. Izan ere, 250 tiket saldu dituzte taloa, postrea eta txokolatea hartzeko.
Edonola ere, ospakizunak ostiralean hasiko dira. 12:00etan meza egongo da eta 12:30ean txorizo jana. Ordu horretan ere inauguratuko dute herriko fatxaden argazki lehiaketa. Aurten 20 irudi inguru jaso dituzte (atzo amaitu zen parte hartzeko epea) eta epaimahaiak erabakiko du nortzuk izango diren bi argazki sarituak.14:00etan jakinaraziko dute ebazpena.
Amaitzeko, Korterraza film laburren jaialdiaren edizio berria izango dute 22:00etan eta krispetak eskainiko dituzte.
Larunbatean, arratsaldetik gauera arte
Dena den, larunbatean antolatuko dituzte ekintza gehienak. 16:00etan mus txapelketan izena emateko epea irekiko dute erretiratuen txokoan. 20 euro balioko du bikote bakoitzaren inskripzioak eta irabazleek 300 euro jasoko dituzte, bigarren bikoteak 150 euro, hirugarrenak 50 euro eta laugarrenak bi txakolin botila.
Arratsaldeko bostetan umeentzako puzgarriak eta tailerrak eskainiko dituzte eta 18:00etan pintxopotea. Handik ordu erdira talo tailerra emango dute herriko haurrekin eta 20:30ean talo jana helduko da, aipatutako 250 parte hartzaileekin.
Gaueko hamarretan bingoaren unea izango da eta, ondoren, zozketarekin eta Gauargi erromeriarekin itxiko dute egitaraua.