Atzo ez-ohiko udalbatza izan zuten Aiaran eta zabor bilketaren tasaren eguneraketa onartu zuten. %8ko igoera ezarri dute eta hobariak %10ean mantenduko dituzte. Edonola ere, gogoratu beharra dago onura horiek jasotzeko aurten eman behar zela izena, ziurtatzeko etxeko konpostajean, konpostaje komunitarioan edo, jatetxeen kasuan, etxez-etxeko zerbitzuan parte hartzen zela.
Konpostajearen bitartez hondakin gutxiago sortzea ekiditen da eta hori saritu nahi du tokiko erakundeak.
Tasa berriak aurrera egin zuen Pruden Otegi alkatearen kalitatezko bozari esker. Izan ere, EAJ abstenitu zen eta Aiara Batuzek kontra egin zuen. Berdinketaren ondorioz, alkatearen boza gailendu zen.
Aipatu beharra dago eguneraketaren arrazoia dela zerbitzu publiko hori autoaskia izan behar dela, Europar Batasunak zehaztutako irizpideen arabera. Horrek esan nahi du tasaren bilketatik lotutako diruaz finantzatu behar dela eta igoerak egon direla eskualde osoan. Aiaran, esaterako, iaz %11koa izan zen garestitzea eta kasu deigarriena Amurriokoa izan da, aurten %70 baino gehiago handitu baita.