Langabezia jaitsi egin dela diote datuek. 2015eko urtarrilean 3.539 langabe zeuden Lanbiden erregistratuta. Aurtengo urtarrilean, baina, 3.072 kontabilizatu ziren. Hau da, 467 gutxiago.
Jaitsiera bat eman den arren, langabezi-tasa altua izaten jarraitzen du eskualdean. Eskualdeko bi herri populatuenen, hau da, Laudioren (% 17,3) eta Amurrioren (% 15,7) tasak EAEko bataz-bestekoaren (% 14,6) gainetik daude.
Emakumeak, kolpatuen
Badaude horrenbeste aldatu egin ez diren beste gauza batzuk ere. Emakumeena jarraitzen du izaten langabeziak gehien kolpatzen duen sektorea, langabetu guztien % 56a baitira.
Adin-tarteen arabera ere aldatuz doa langabezi-tasa. Langabetu gehienak (1.491) 25-44 urte artean dituzte. Beste 1.437 langabetu 44 urte baino gehiago dituzte eta azken 144ak ez dira 25 urtera iristen.
Langabetu gehienak (1.902) zerbitzuen sektoreko langileak dira, 493 industriako langileak dira, 258 eraikuntzakoak eta beste 91 nekazaritza sektorekoak. Azken 328ak, baina, aurretik lanposturik izan gabekoak dira.
Urtarrilean sinatu ziren kontratuen % 94,5 aldi baterakoak ziren
Prekarietatea nagusi
Langabetu kopuruak behera egin duen arren, horrek ez du lan merkatuaren egonkortze bat ekarri. Prekarietatea da nagusi lanpostu gehienetan. Hori erraz ikusi daiteke urtarrilean eskualdean sinatu ziren lan-kontratuen kopuruei erreparatuz gero: 1.653 kontratutik 91 (% 5,5) baino ez ziren mugagabeak. Gainontzekoak (1.562) aldi batekoak ziren.
Gauzak ala, epe laburreko kontratuak dira nagusi. Laudion, adibidez, 31 egunekoa da bataz besteko kontratua. Urduñan, berriz, 8 egunekoa baino ez.