Bihar argitaratuko da 2016ko lehen Aiaraldea Egunkaria eta, ohikoan bezala, eduki anitzez osatua egongo da.
Bi izango dira egunkariko eduki nagusiak, bi erreportaje. Bata eskualdeko 13 enpresa kutsatzaileenen datuak izango ditu aztergai. Bigarrena, berriz, miru gorriari buruzko erreportaje didaktikoa izango da, Naturayalako kideek idatzi eta argazki ikusgarriekin hornitutakoa.
Kultura atalean, berriz, ezohiko gai bat ekarriko dugu gurera: bideo-jokoak. Bideo-jokoetan euskaraz aritzeko sortutako Game Erauntsia komunitatearen sustatzaileetako bat den Urtzi Odriozolarekin mintzatuko gara horretarako. Burubio elkarteko kideek abian jarritako egitasmoari buruzko artikulu bat ere topatu ahal izango du irakurleak.
Motokrosa eta Papamovila
Hasi berri dugun urteko lehen albisteei hiru orriko errepasoa ere egin ahal izango die irakurleak. Kirol atalean, berriz, Eneko Martinez izango da protagonista. Motokrosean aritzen den euskal herritar gazteena da bera.
Kontrazalean, berriz, Nora Calzadak abian jarritako Papamovila gertuagotik ezagutzeko aukera izango dugu.
Kolaboratzaileak ere ez dira faltako zenbaki honetan. Txema Urkijo, Itziar Larrazabal, Asier Amondo, Jon Muñoz eta Itziar Urkijoren iritzi-zutabeak egongo dira, eta baita Lander Arteagaren zinema proposamena edota Gorka Belaskoren komikia ere.