Errotatiban dago jada bihar argitaratuko den Aiaraldea Egunkaria. Hamabostekariaren 40. zenbakia izango da eta, ohikoan bezala, eduki anitzez betea egongo da.
Portadan Maria Barbero urduñarra izango da jaun eta jabe, Espainiako Motoziklismo Kopako abiadura txapeldun izatea lortu baitu. Berari eginiko elkarrizketa irakurtzeko parada izango du irakurleak, Kirol atalean.
Erreportaje nagusiak, berriz, oso bestelako gai bat izango du hizpide: katalamua. Marihuanak Aiaraldean duen presentzia landuko du testuak, ikuspuntu sozio-ekonomiko zein medikotik.
Jendartean, berriz, arropari bigarren bizitza bat ematea xede duten proiektuak izango dira protagonista: Laudioko Caritas eta Kooperaren denda, Amurrioko Laguntza, Urduñako Biltegi edota Orozkon sortutako Truca Rec.
Sozio-ekonomiaren atalean merkataritza txikiaren nondik norakoen berri jasoko du irakurleak; 2008tik hona eskualdean 124 saltoki desagertu direla jakingo du, beste gauza batzuen artean.
Kultura atalean, berriz, eskualdeko udal liburutegien orainari eta etorkizunari buruzko artikulua egongo da, eta baita Aketza Merinok Amurrioko Urkamendiari buruz idatzitako testu bat ere, Jabi Isasiren ilustrazioez lagundua egongo dena.
Azken bi asteetan eskualdean jasotako gertakariek ere izango dute euren lekua, Herriz herrikako atalean.
Haritz usaina izango du egunkariaren zenbaki honek, Gernikako Arbolaren kolonia egin duen Alfredo Pereirori eginiko elkarrizketa egongo baita kontrazalean.
Honako hauek izango dira oraingoan egongo diren zutabe-egileak: Norberto Aldaiturriaga, Raul Arza, Maider Iglesias, Luis Vil eta Miren Ayesa. Komiki-tira egiteaz Floren Usia arduratu da oraingoan.