Inprentan dago jada Aiaraldea Egunkariaren 35. zenbakia. 16. orrialdeetan barrena hainbat gai potoloren berri jaso ahal izango du irakurleak.
Alde batetik, Dani Luengas arkitekto urduñarrak egindako erreportajea dago. Euskal Herriko dorretxeei buruzko tesia ari da prestatzen Luengas, eta eskualdeko dorretxeen historia eta bilakaerari buruzko artikulu didaktikoa osatu du, hainbat mapa, irudi eta fitxekin hornitutakoa.
Ez da hori izango zenbakian egongo den erreportaje bakarra: LOMCE eta Heziberri 2020 Hezkuntza Erreformen inguruko bat ere egongo da. Gure Hezkuntza plataformako kide bati, Lehen Hezkuntzako irakasle bati, guraso bati eta ikasle mugimenduko kide bati eginiko elkarrizketez osatutako artikulua izango da.
Liga amaiera
Kirol atalean, berriz, liga amaierako emaitzek hartuko dute protagonismoa. Eskualdeko futbol, saskibaloi, hockey eta eskubaloi taldeen emaitzak bildu ditugu, eta hainbat taldek datorren ikasturtean mailaz igoko direla ikusi ahal izango du irakurleak bertan.
Kulturan, berriz, Green Valley taldeko kidea den Egoitz Uriarte musikari urduñarrari eginiko elkarrizketak hartuko du espazio gehiena, baina egongo da bestelako gauzentzako tartea ere: SOS Laudioko Lamuza Parkea plataformak antolatutako I. Koreografia erakustaldiari buruzko kronika baterako, esate baterako.
Herriz-herrikako atalean azken hamabostaldian eskualdean emandako berri esanguratsuenen bilduma topatuko du irakurleak.
“Alas de Orduña” aeromodelismo klubeko kide bati eginiko elkarrizketarekin bukatuko da egunkaria, kontrazalean.
Oraingoan lau aiaraldear arduratu dira iritzi-zutabeak idazteaz: Norberto Aldaiturriaga, Luis Vil, Javi Aspuru eta Irati Marañon. Komikia, berriz, Rubik egin du.
Egunkaria bihar goizetik aurrera topatu ahal izango da eskualdeko saltoki, taberna, eskola, kulturgune zein kaleetan. Aiaraldea Herri Elkargoko kideek, berriz, gaur arratsaldean jasoko dute posta elektroniko bidez.