Nerbioi-Goienako Tokiko Elikadura Batzordeak bere ibilbide publikoa hasi du. Horretarako ostegunean hitzaldia eskainiko du Laudioko Kultur Etxeko Arraño Aretoan 19:00etan. Ekimen horren helburua ikastetxetan eskaintzen den elikadura ereduari buruz eztabaidatzea izango da.
Batzordeak azaldu nahi du Euskal Herrian garatutako esperientzien arabera eskola-jantokietako autogestio-eredua ez dela “catering” enpresena baino garestiagoa eta tokiko produktu ekologikoetan oinarritzen dela gainera.
Ildo beretik, elikadura osasuntsua sustatu ez ezik, tokiko ekoizleak ere babesten direla nabarmendu nahi dute hizlariek; eskolapublietako jantokietako proiektuaren sustatzaile den Iñaki Lazarobaster legebiltzarkideak eta Marijo Imaz Urduñako Udaleko Ekoizpen zerbitzuko teknikariak, hain zuzen.
Jardunaldia jende ororentzat antolatu dute, baina, batez ere, eskualdeko ikastetxe eta gurasoen elkarteei begira gauzatuko da, jantoki eredu berria sustatzeko asmoa baitaukate.
Urduñan proiektu pilotua
Irailetik aurrera Eusko Jaurlaritzak proiektu pilotua abiatuko du Urduñan eskola-jantokietan tokiko produktu ekologikoekin egindako menuak eskaintzeko. Hautatutako ikastetxeen artean Urduñako Herri ikastetxea dago.
Nerbio-Goienako batzordea
Nerbioi Goieneko udal guztietako ordezkari politikoek, udalerrietako teknikariek, kontsumitzaileek, ekoizleek, eta esku hartzen duten beste agente batzuek osatzen dute Tokiko Elikadura Batzordea. Helburua eskualdeko elikadura-autonomia areagotzea da.