Gaur argitaratuko da Aiaraldea Hemen hamabostekariaren 71. zenbakia. Ohikoan bezala, hainbat eduki izango ditu. Zurrumurruen aurkako borrokari buruzkoa izango da erreportaje nagusia. CEAR-Euskadi erakundeak Laudion eta Amurrioko hainbat auzokiderekin egin duen dinamika izango du hizpide.
Egongo dira baita beste artikulu batzuk. Kultur atalean Luis B. Rodriguez Ibernia izango da protagonista. Kirol atalean, aldiz, Andima Errazti Guarestiri eginiko elkarrizketa topatu ahal izango du irakurleak.
Bi atal berri
Bi atal berri estreinatuko ditu biharko aleak. Eskualdeko argazkilarien txokoa izango da horietako bat. Ale bakoitzean Aiaraldeko argazkilari baten irudi esanguratsuenak ikusteko aukera izango du irakurleak, argazkilariaren beraren azalpenekin batera. Bego Guillén Amurrioarrak inauguratuko du atal hori.
Beste atala “Historiaren istorioak” izango du izenburu eta eskualdeko historiaren pasarte bat kontatzea izango du helburu, modu irakurterraz batean idatzita eta ilustrazio baten laguntzarekin. Aketza Merino historialariak ikertutako bandoen gerra izango du hizpide atal horren lehen aleak, eta Aimar Gutierrezek ilustratuko du.