Espainiako Epaitegi Konstituzionalak Eusko Legebiltzarrak onartutako Frackingaren aurkako legearen bi artikulu baliogabetu ditu; 2. eta 3. artikuluak, hain zuzen ere.
Epaileek erabaki dute artikulu horiek estatuaren eskumenen kontrakoak direla, nahiz eta haustura hidraulikoa guztiz ez debekatu. Esaterako, 3. artikuluak ez zuen ahalbidetzen frackinga gauzatzea eraikitzeko balio ez zuten lursailetan, baldin eta ingurumena kaltetzeko aukerak egonez gero.
Zentzu horretan, Konstituzionalak azaldu du eskuduntza horiek erkidegoen ahalmenak gainditzen dituztela.
Aiaraldean 5.000 sinadura
Fracking Ez Aiaraldeak 5.000 sinadura baino gehiago jaso zituen 2014an eskualdean. Guztira, EAEn 103.000 lagunek baino gehiagok babestu zuten Herri Ekimen Legegilea. Geroago, Eusko Legebiltzarreko alderdi gehienek onartu zuten egitasmoa.
Gatazka ugari
Horrez gain, 2013an Saia baimenaren harira zenbait gatazka, sabotaje eta mobilizazio jazo ziren eskualdean, Eusko Jaurlaritzaren SHESA enpresak ikerketa sismikoak egin zituenean.
Gorobeletik Gorbeiara, Orozko, Laudio edota Luiaondo barne, Aiaraldean haustura hidraulikoaren aurkako mugimendu bizia egon da.