Tubacexeko afiliatuen batzarra egin zuen ELAk atzo. 100 behargin baino gehiago bertaratu ziren bilerara, sindikatuak azaldu duenez. “Euren iritzia entzun ostean erabaki dugu biharko grebarekin bat ez egitea”.
ELAk salatu du greba “zuzendaritzarekin egingo zen bilera baino lehen” zegoela programatua. Sindikatuak azaldu du greba “STATek, LABek eta USOk aurkeztutako puntuak” lantzeko deitu dela. “Ez dute gehiengo sindikala ordezkatzen eta ez dakigu zeintzuk diren puntu horiek”.
Hori dela eta, ELAko ordezkariek azaldu dute ez dutela greban “gonbidatu gisa” parte hartuko.
"Ez da serioa"
“Ez zaigu aukerarik eman negoziazio fase honetan aurrera eraman nahi duten estrategian parte hartzeko. Lan-hitzarmenaren alde gaudela ezin da gu baztertzeko arrazoia izan”. Era berean, salatu dute langileei ez zitzaiela esan planteatzen zen alternatiba greba zela.
Mobilizazioak “modu serioan” egin behar direla aldarrikatu dute, “helburuak, egutegia eta deitzaileen antolatzaileen konpromisoarekin. Azken puntu hori ere zalantzan jarri dute sindikatuko kideek: “Ez zaigu serioa iruditzen greba ostiralean egitea deitzaileetako batzuk opor eguna hartua dutenean. Langileriarekiko engainua da hori, eta ez dugu babestuko”.
Bukatzeko, aparteko orduak ezartzea onartuko ez dutela azpimarratu dute, “ez orain ez lehen”.
